جذبة ابريل يا وزارة الاعلام حدها باخيه!!!

الوالد: شاق الحلج
بو سعد: خير انشالله
الوالد:اخوك يقول طيحوا القروض
بو سعد: شلون!!متى!!وين!!
الوالد:روح لاخوك اهو يقولك التفاصيل
..................................
بو سعد:ها قولي من وين سمعت هالخبر!!
اخوي:قاعد على التلفزيون حزة الضحى لاني ما داومت اليوم جان اشوف اعلان ان الحكومه اسقطت القروض!! بطلت عيني عدل !!وريت الاعلان للاهل.!!بعدين استوعبنا فهيصنا
بو سعد:ليكون هذي جذبة ابريل وانا ما ادري؟ تبي تمشيها علينا!!
اخوي:قسما بالله الي خلقني.بعيوني انا و القوم الي معاي.
دقيت على القوم: واذا هم مارين على شارع الخليج ويقولون فيه مسيره
بطلت التلفزيون و اغاني وطنيه اغنيه و رى اغنيه
حسيت ان هالخبريه فيها ان.وقلت لازم اعرف السالفه

...........................
وبعد اتصالات على المعارف بمن هم يعملون في وزارة الاعلام.....طلع ان هالجذبه الفها مجموعه من الاعلاميين و قاموا ببثه و قد تم احالتهم للتحقيق.

هاردلكم يا اهل الكويت ككككككككككككككككككك

مملكة البحرين و مجلس الامه و الجامعه

مملكة البحرين و مجلس الامه و الجامعه
تحه للملكة التواضع...تحيه للملكة البحرين... تحيه لكل شابه وشاب بحريني لم يهمه المهنه و المال كثرما يهمه خدمة الوطن ورفعته.
زيارتي للبحرين هذا العطله كان اول زياره لي وإنشالله موالاخيره ..تلقيت دعوه من اخوه اجمعتنا الظروف الجميله بمخيم خليجي اقيم
في الامارات العربيه المتحده ..ولبيت الدعوه , وعلى اجواء الموسيقى الكلاسيكيه في احدى المطاعم الايطاليه دار حوار بيني وبين ربعنا
البحرينيين ...وتكلمنا فيها عن الاوضاع السياسيه بالكويت (اقصد مجلس الامه و ربعه)
وطبعا التطنز كان على ودنه ..لكن انا مالي اي حجوه الجماعه صاجين مااجذبوا...!!

قالي عيسى عن سالفة ترشيد ..انتوا يا اهل الكويت كل هالخير الي عندكم وحاطين هالعداد عسا ما شر !؟
قلتله والله يا عويس انت الصاج ملايين انقطت على الحمله لو اندفعت لمحطتين و سكينا السالفه ابرك من إنا نصير علج عند
الخليج بس تصدق هالحمله يابت نتيجه ردت للكويت كذا بليار ....قالي هذا الي يحببني باهل الكويت يحبون ديرتهم , ولولا تفاعلهم ما امنت
لمستقبلهم و لاجيلها القادمه

ناظرت واحد من هالشباب الطيب ...أول ما شفته عجبني اسلوبه ,سبحان الله عليه سمات الذكاء فسالته عن تخصصه وقلت شكلك امتياز و
لا بعد مرتبة شرف ...رد عل و هو يضحك شدعوه لكن نسبتي حلوه 84% بالقصب و بالحسره اقبلوني (معهد التكنولوجيا شي جذي!!)(الحبيب يقولها وهو يتزامط علينا و يتباها !!
الحبايب طقتهم البوهه يوم تكلمت عن نسب القبول في جامعتنا الحبيبه , سالني واحد كليتكم ما تبيني تراني خوووش طالب؟؟...
.بعد هالسالفه تحمد صاحبي عشر تعش مره على كليته صاحبة الرغبه الخامسه:)

سالني عويس عن الاعانه الجامعيه و قالي يا فلان شسالفة الاعانه الجامعيه عندكم..؟؟ فوق ما يعطونكم هم تطالبون بأكثر المفروض تحمدون
ربكم ترى الطمع مو زين ...لو دروا فيها شبابنا جان الكل درس عندكم ...(بلاهم ما يدرون وين تروح الاعانه ..صج ليه قال المثل <الاسم شايع و البطن جايع>)

وكالعاده عويس يسال و الربع مستمعين ...قالي هالمشاكس البنت الكويتيه هي أول إمرأه خليجيه في الذوق و الكشخه و الموديلات ’لكن في شي واحد ما يعجبني والي اهو الصبغ الي على و جوهم......قمت اتكعكع قلت يا عويس لا تعمم و بناتنا فيهم الخير و البركه و إن ما غيرت الموضوع بيخذفونك بنات الطاوله الي وراك تراهم كويتيات...الاخ خاف على عمره وتملص

قال امطوعنا عمر....على طاري البنات ...منت ناوي تعرس...رديت ما لقت اخويتي إلي ابيها...رد حبلك وحده و تزوجها ولا شرايك؟؟!!
قلت راي انك خوووش مطوع :) (حب يطلعنا من الجو السياسي الولد:)

من خلال هالحوار إلي دار بيننا تغيرت عندي مفاهيم كثيره ... وكنت معارض لاشياء عده مثل نسب عمادة القبول و امتحان القدرات و كذلك الاعانه الجامعيه و جملة ترشيد ..ونحمد الله على هذا الحال حكومتنا ما تقصر و لو ان في قصور هاليوميين ...فبشكر تدوم النعم.

فرعون الشعر

قبل شهر عيال عمنا من السعوديه ال ناصراقبلوا علينا...وبعد الغدا طلب مني واحد من الشباب نشافه!!

قلت : نعم!! قال: النشافه النشافه قلت: شلون تبيني ايبلك النشافه!! جان ياشر على فوطه

طول هالفتره ضنيت يبي ينشف ايده بنشافة الغساله خخخخخ

بعدها قعدنا و سوالف و تبادل بلوقات و بلوتوثات فياب طاري ناصر الفراعنه!! و دزلي قصيدته عن طريج

البلوتوث.فتفاعلت جدا مع القصيده كون كلماتها غريبه و انها تتكلم عن تاريخ السباع!! لكن اكتشف ان لهذا الشاعر

قصائد اروع و اجمل.. ببرنامج شاعر المليون. والغريب في الامر ان هناك اشاعه طلعوها انه مسكون!! وذلك لان عنوان احد قصائده

((ملوك الجن))...لك البيرق يا بو فارس لا خلا و لا عدم يا ولد عمي ...هذي ضريبة النجاح

ابطال التحرير

قبل يوميين وصلني cD من احد الاصدقاء من القائمه الائتلافيه....جزاهم الله خير على هذا العمل الطيب...يعرض فلم بعنوان


((قصة وطن)). بل هو ايضا قصه ابطال شرفاء ...ورجال مواقف ...مشاهد هزت كياني...تمنيت لو كنت مولودا و شابا انذاك
بحمل السلاح مثلما فعل ابطال كيفان....الذين وضعوا الدين ثم الدوله فوق اي انتماء طائفي و حزبي. ليت من هم بامثال لاري و
عبد الصمد ان يتعلموا منهم.


سني +شيعي+ بدو +حضري= كويتي
معادله حققها اهل الكويت اثناء الغزو العراقي . وزاد تتمسكهم بها بعد الغزو العراقي. لدرجه ان احدى الكتاب الخليجيين كتب مقال يفيد فيه انه لم يشهد دوله خليجيه بهذا الروح من الوطنيه مثل دولة الكويت.(انظلونا)...بالسابق كان المواطن لمن يقول انا كويتي بفخر...كان يقصد من
ورى هالفخر هو الانتماء. اما الان اصبحت الكماليات و الامور الماديه سبب فخره!!!(ولا للتعميم)

ان ليوم التحرير معنى اعمق من رش الفان و (هز خصور و طق طبول) بل المعنى الحقيقي للاحتفال بهذا اليوم هو تذكير الشباب
بابطال التحرير الذين كاونوا كالجسد الواحد جمعهم حب الله ثم الوطن

يقول رسول الله المسلم للمسلم كالجسد الواحد اذا اشتكى منه عضو تداعى له سائر الجسد بالسهر والحمى



موقف يستحق الذكر:
كنا متجهين للطائف....فاذا بالسائق سعودي الجنسيه يشير باتجاه فندق على قمه الجبل و يسال: اتعلمون من كنا نشاهد هناك!!!
قلنا من؟؟ قال : لقد رزقكم الله بشيخ نحسدكم عليه انه الشيخ جابر لم يكن ليله ليل و لا نهاره نهار ....يمشي ذهابا و يابا و التلفون لم
يقع من يديه....فقلت: دمعة بابا جابر الله يرحمه .........(.صمت)اخنقتني العبره


لولا الله ثم ابوي جابر و رجال المقاومه و دول الخليج و مصر و USAو غيرهم لمسحت الكويت من الخريطه و اصبحنا متشتتين في تلك الدول............................فهؤلاء من يستحق ان نشكرهم


حفظ الله و كويتنا من كل مكروه

عيدي يا كويت

صلة الارحام!!

صلة الارحام باتت شبه معدومه. تلاقي الواحد مشغول بامور الدنيا و ناسي ان عنده اهل وجب عليه السؤال عنهم.لا خلاف ان صلة الرحم واجبه . وقطيعتها معصيه من كبائر الذنوب. وقد جاءت ايات كثيره يامر الله .كما لا ننسى ان لصلة الارحام افضال عديده تعود على الفرد نفسه ...في قوله رسولنا الكريم

# عن عائشه رضي الله عنها قالت: قال رسول الله عليه الصلاة و السلام((الرحم معلقه بالعرش تقول: من وصلني وصله الله،ومن قطعني قطعه الله))البخاري- الفتح10(5989) مسلم(2555)وهذا لفظه

#وعن انس بن مالك رضي الله عنه قال:قال رسول الله صلى الله و عليه و سلم:((من سره ان يبسط له في رزقه ،ويُنسأ له في أثرة،فليصل رحمه))البخاري- الفتح10)5989)مسلم(2555)وهذا لفظه

بو سعد و القطاعه!!!

طبعا انا واحد من هذول القاطعيين،ودائما هالقطاعه تحط الانسان في مواقف لا يحسد عليها، فمن المواقف الطريفه التي تعرضت لها:أن واحد من عيال العمام طلبه الوالد علشان يصلح الكمبيوتر............دخلت صالته شفته...لكن كشت فيه ودخلت داري مباشرة...وظليت تقريبا ساعه احوس بالبيت...ولا معطي اي اهتمام له ضننا مني عامل ياي يشتغل و يتوكل على الله.....فجاه واحد من اخواني دخل الصاله وسلم عليه!!؟؟(هـــــــــــــــــــــــــــــــــــــــــــــــــــــــلا والله) ويفزله فز...طبعا انا بحلقت عيوني وطقتني البوهه...رحت صوبه قلت له انت منو؟؟!! طالعني باستهزاء و قال لي انا ولد الجيران...وكل الي بالصاله هاهاهاها بطوها ضحك...رد الوالد وقال هذا ولد عمك الفلاني:) طبعا انقص ويهي...



ولكم هالموقف الطريف يحدثني فيه واحد من الشباب...يقول : عيال عمنا مسيريين من السعوديه..فقام عمي (شيخ القبيله) يبي يمر يسلم على الوالده..فخذيتهمن الديوانيهاهو مع شايب ثاني من طقه(الثمانينات) ورحنا لصاله الاستقبال الحريم...فسلموا على الوالده...يقول (اهني السالفه) : اختي الصغيره(18 سنه) ملتزمه ووايد وتدقق على سوالف سلام الايد....فشفتها بالحوش تفر...صوت لها و قلت سلمي على عمج...قالت دام انه عمي أسلم فمدة اليد و باست الراس لانه شايب...جان اقولها سلمي على عمي الثاني(طقه الثمانينات) قالت اكيد هذا بعد عمي؟؟ قلت اي...فسلمت بمدة اليد و بوسه الراس ...وبعد خمس دقايق جان يقول الشايب (طقه الثمانينات) بصوت عالي تزوجزني هالبنت!!
اختي صايحت نعم!! يا الشايب انت عمي!! شلون؟؟..........قال الشايب: ومن قال؟؟.........قالت اخوي!!...........طبعا انا اهني انقص و يهي وختي عصبت علي!!لكن ما طوفت النكته الي قالها الشايب..........تزوجونياها لكم عمارتيين و فوقهم ناقه!!......:)

اهم شي الناقه.......كككككككك

طبعا انا شخصيا لي مواقف لا تعد ولا تحصى.......لكن الحمد لله بدينا....ها...شوي...ننطلق و نسير....والحمد لله المهمه سهله كل الاهل بمنطقه وحده











نصيحه لا تصير غشيم!!!
.................................


واحد من الربع...وقف سيارته عند احد المجمعات التجاريه...وقام يدور بوكه بالسياره...وصارله فتره يدور وما لقاه...مر واحد من هالشباب وقال لصاحبنا:مضيع شي؟؟
صاحبنا:اي بوكي بالسياره
الرجال:بدور وياك ...جود نلقاه!!
وفعلا دوروا لين لقوا البوك..وتشكر صاحبنا الريال و توكلوا على الله .. ومر ربع ساعه بعدها اكتشف صاحبنا ان 170 دينار الي كانوا محطوطين على الكرسي الثاني اختفوا!!!
قال صاحبنا وليييه ..الحين هذا وين احصله....!!باقني......!!وشوي ما وعى الا الرجال يتركله بالخط السريع و يوقفه
الرجال:والله لو اني مو ولد حلال جان ما رديت 170 لك!
صاحبنا:بييييه وانت شدراك اني بهالخط؟؟وليش تاخذهم و تردهم؟؟
الرجال:انا تعمدت اسوي فيك جذي علشان تحترس وما تصير على نياتك ..وتثق بالكل...واذا ما تبي الفلوس.........ترى طول الطريج الشيطان يوزني اعشي ربعي فيهم:)

فعلا موقف خلاني ابحر في عالم ثاني...تعلمت منه (لا تصير على نياتك وتثق بالكل...الناس مو سوى...)







ردينا على الطير يلي!! يا ترشيد
......................................


يا جماعه الخير الي متظايق من جماعه الو ترشيد و يبيني اضغطه تراني حاظر...حولولي مكالماتهم وانا اعرف شلون اتصرف معاهم ...فوق ما هم قاطعن كهربت بيتنا هم يدقون ويقولون قللوا الاستهلاك...انا اقول لو تسون ترشيد للفلوس الي تنقط على دعاياتكم يتراولي احسن....

كل عام و انتوا بخير:)

اسال الله ان يجعله عاما مديدا علينا بالصحه و اليمن و البركات

الامتحانات و البراشيم

صادوووووه

الامتحانات على الابواب

بدا العد التنازلي لتقديم امتحان نهاية الكورس الاول.... و التنافس بين الطلبه
بدا يزداد للـــــــــحصول على اعلى الدرجات.. .....اسال الله ان يوفق الجميع

ملاحـــــــــــــــــــــــــــــظه: للي يبي براشيم تراني حاظر ...بس دزلي مسج
على الايــــــــــــــــــــــــــــميل ..اعطيك اسم المحل بمـــــــــــــنطقه الفحيحيل
فقـــــــــــــــــــــــط لمن ينطبق عليهم المثل:((اهل عالي ما فكروا الا تالي)).
انا بس اعلم وما ابرشم:)


على طاري البراشيم......واحد من الربع يسولف و يقول عنده واحد من الشباب صارتاجر؟!
قلنا شلون؟! قال يبيع البرشومه الوحده بربع و الطلبه طق مطاقق عليه.شكلي بنزل منافس له
بالسوق و ابيع الوحده ب100 فلس.


وهـــــــــــذا الموقف يتلني لموقف ثاني مع الوالد طاحت بايدي برشامه تتكون من25 صفحه
مختــــــــــــــــــــــــــــــصره كتاب الاحياءللصف الرابع الثانوي اخذتها للبيت ووريتها للوالد
من بــــــــاب الضحك ..ما وعيت الا الوالد خذها و خشها بالتجوري فاستغربت؟! قلت ليش؟!
قــــــــــــــــــــــــــــــــــــــــال علشان تنتفع منها بالمستقبل..!! شفتوا شلون مضبطني الريس!!


اما البـــــــــــــــــــراشيم بمدارس البنات حدث ولا حرج...تدش البنت غرفه المدرسه من فير الله و تبطل
الدرج و تسويلها تجمعات و حسك عينك تبطل المدرسه حلجها ان طاحت عليهم..(..المدارس الخاصه)
ها عيل يدرسون ببلاش!!





و لكم مواقف ثاني لاحدى الطالبات لمن طاحت المدرسه على برشامتها تحت الطاوله ومو اي برشامه؟
لا برشامه مسطره و مرتبه و هالخط الحلو

المدرسه: ايه ده؟؟!(باللهجه المصريه#
البنت: مو لي #
المدرسه:وكمان مجلداها(الاخت مجلده البرشامه #
البنت: تعرفين المكيف ينقط ماي اخاف تتبلل
المدرسه: وكمان ضد الميه؟!!#

يا عيني على التطور

اما على مستوى الجامعه ...هين حلم ابليس بالجنه فيك خير غش!!....بالذمه تفكر تغش يوم تقرا قانون الطرد ان اكبسوا عليك









نغزه



رجل المهمات الصعبه!!

هل تــــــــــــــــــــــــــــــعرف من هو رجل المهمات الصعبه؟!
هو رجـــــــــــــــــــــــــــــــــل يهب لمساعدتك في حين لم تطلب
لم تطـــــــــــــــــــــــــــلب منه ذلك..!!شخص يقدم لك النصيحه
فــــــــــــــــــــــيامرك و ينهيك ليبرهن للاخرين بانه ذو سلطه
انه شــــــــــــــــــــــخص مصاب بمرض الكذب...فيكذب عليك
مدعـــــــــــــــــيا بانه يريد مساعدتك..شخص لم يسمع الحكمه
التي تقول:((ليس شجاعا ذلك الكلب الذي ينبح على جثة الاسد